बर्डी पुलावर भीषण अपघात: तीन वाहनांची जोरदार धडक, दोघे कोसळले पुलावरून खाली

नागपूर: बर्डी पुलावर सोमवारी सकाळी एक भीषण अपघात झाला. या अपघातात एक कार, एक ट्रेलर आणि महिंद्रा 207 या तीन वाहनांची जोरदार टक्कर झाली. अपघात इतका भीषण होता की दोन व्यक्ती थेट पुलावरून खाली कोसळले.

प्रत्यक्षदर्शींनी दिलेल्या माहितीनुसार, टक्कर प्रचंड वेगात झाली आणि त्या क्षणी पुलावर एकच गोंधळ उडाला. अपघाताची माहिती मिळताच पोलिस व रुग्णवाहिका तात्काळ घटनास्थळी दाखल झाले आणि बचावकार्य सुरू करण्यात आले. जखमींना जवळच्या रुग्णालयात उपचारासाठी दाखल करण्यात आले आहे.

या अपघातामुळे बर्डी पुलावरील वाहतूक पूर्णतः ठप्प झाली होती आणि मोठा वाहतूक कोंडीत नागरिक अडकले होते. पोलिसांनी वाहतूक नियंत्रणासाठी प्रयत्न सुरू ठेवले होते.

प्राथमिक तपासात ब्रेक फेल होणे किंवा वाहनाचा अतिवेग हे कारण असल्याची शक्यता वर्तवली जात आहे. पोलिसांनी घटनास्थळावरील सीसीटीव्ही फुटेज तपासण्यास सुरुवात केली असून, पुढील तपास सुरू आहे.

या घटनेमुळे नागपूरकरांमध्ये भीतीचे वातावरण निर्माण झाले असून, स्थानिक नागरिकांनी बर्डी पुलावर सुरक्षा व्यवस्था वाढवण्याची मागणी केली आहे.

एक  प्रत्यक्षदर्शी म्हणाले, “आवाज एवढा जोरात आला की सगळीकडे एकदम गर्दी झाली. दोन माणसं पुलावरून खाली पडली हे पाहून अंगावर काटा आला.”