नरसाळा स्मशानभूमीजवळ पाणी साचले, अनेक नागरिक अडकले; बचाव कार्य सुरू

नागपूरमध्ये सततच्या मुसळधार पावसामुळे, नरसाळा स्मशानभूमीजवळ राहणारे अनेक नागरिक  पाण्यात अडकले आहेत. परिसरातील पाण्याची पातळी अचानक वाढल्याने नागरिकांना सुरक्षितपणे बाहेर काढण्यात अडचणी येत आहेत.

परिस्थितीचे गांभीर्य लक्षात घेऊन अग्निशमन विभागाच्या पथकांनी तातडीने बचाव कार्य सुरू केले आहे. अग्निशमन विभागाचे कर्मचारी रबर बोटी, लाईफ जॅकेट आणि इतर आपत्कालीन उपकरणांच्या मदतीने लोकांना सुरक्षित ठिकाणी नेण्याचा प्रयत्न करत आहेत. पाणी साचण्याची पातळी इतकी जास्त आहे की स्थानिक रस्ते पूर्णपणे बंद झाले आहेत.

नागपूर महानगरपालिका आणि आपत्ती व्यवस्थापन प्राधिकरण या कामात समन्वय साधत आहेत. नागरिकांना बचाव पथकांना सहकार्य करण्याचे आणि सूचना मिळेपर्यंत घरातच राहण्याचे आवाहन करण्यात आले आहे.