सिव्हिल लाईन हत्या प्रकरण: जावईच निघाला हत्यारा, पोलिसांनी २४ तासांत केली खुनीला अटक
नागपूर: नागपूर शहरातील खळबळजनक हत्याकांडाचा उलगडा पोलिसांनी काही तासांतच केला आहे. शहरातील पॉश भागात असलेल्या सिव्हिल लाईन्समध्ये एका महिलेची दिवसाढवळ्या निर्घृण हत्या करण्यात आली. पोलिस तपासात असे दिसून आले आहे की ज्याने हा घृणास्पद गुन्हा केला आहे तो दुसरा तिसरा कोणी नसून त्या महिलेचा जावई आहे.
बुधवारी दुपारी नागपूरच्या सिव्हिल लाईन्स परिसरात एक हृदयद्रावक घटना घडली. माया मदन पासेरकर नावाची एक महिला तिच्या कामावरून घरी परतत होती. त्यानंतर एका माणसाने तीचा पाठलाग केला आणि धारदार शस्त्राने गळा चिरून तिची हत्या केली. ही घटना कलाकुंजसमोर घडली. हत्येनंतर आरोपी घटनास्थळावरून पळून गेला.
या घटनेमुळे संपूर्ण परिसरात घबराटीचे वातावरण निर्माण झाले. माहिती मिळताच जॉइंट सीपी नवीनचंद्र रेड्डी, डीसीपी नित्यानंद झा आणि इतर वरिष्ठ अधिकारी घटनास्थळी पोहोचले. घटनास्थळापासून काही अंतरावर बसवलेल्या सीसीटीव्ही फुटेजमध्ये आरोपी मायाचा पाठलाग करताना आणि घटनेनंतर पळून जाताना दिसत आहे.
पोलिसांनी कुटुंबातील सदस्यांची चौकशी केली, त्यादरम्यान एक महत्त्वाची माहिती समोर आली. मायाची मुलगी गीता हिने चार वर्षांपूर्वी मुस्तफा खानशी प्रेमविवाह केल्याचे उघड झाले. मुस्तफाने मायाला ५ लाख रुपये उधार दिले होते. पैसे परत मागण्यावरून दोघांमध्ये वारंवार वाद होत होते. यानंतर पोलिसांनी मुस्तफाचा शोध सुरू केला आणि त्याला हिंगणा परिसरातून ताब्यात घेतले.
चौकशीदरम्यान मुस्तफाने आपला गुन्हा कबूल केला. त्याने सांगितले की माया पैसे परत करण्यास नकार देत होती आणि तिच्या मुलीवर त्याच्याशी असलेले नाते तोडण्यासाठी दबाव आणत होती. मुस्तफाने मंगळवारी डी-मार्टमधून चाकू खरेदी केला होता आणि बुधवारी संधी मिळताच त्याने मायावर हल्ला केला. पोलिसांनी आरोपी मुस्तफा खानला अटक केली असून पुढील कारवाई करत आहेत.
