नागपूरसह महाराष्ट्रासाठी अभिमानाचा क्षण!राज्य सरकारने लिलावात खरेदी केली नागपूरच्या रघुजी भोसले यांची ऐतिहासिक तलवार
नागपूर : – मराठा साम्राज्याचा एक मौल्यवान आणि ऐतिहासिक वारसा असलेली नागपूरच्या भोसले घराण्याचे संस्थापक रघुजी भोसले यांची ऐतिहासिक तलवार लिलावासाठी ठेवण्यात आली. २९ एप्रिल रोजी राज्य सरकारने खरेदी केल्यानंतर, तिचा प्रत्यक्ष ताबा सोमवारी राज्य सरकारकडे आला. राज्याचे सांस्कृतिक कार्य मंत्री आशिष शेलार यांनी लंडनमध्ये हा अधिकार स्वीकारला.
काही तांत्रिक कारणांमुळे, ती मध्यस्थामार्फत खरेदी करावी लागली. परंतु आता त्यांनी त्या मध्यस्थामार्फत सर्व कायदेशीर औपचारिकता पूर्ण केल्यानंतर ती आपल्या ताब्यात घेतली आहे. आता ही तलवार लवकरच महाराष्ट्रात येणार आहे आणि तिचा कायमचा ताबा राज्य सरकारकडेच राहील. छत्रपती शाहू महाराजांनी राजा रघुजी भोसले यांना ‘सेना साहिब सुभा’ ही पदवी दिली.
राजा रघुजी भोसले यांनी अनेक युद्ध मोहिमा राबवल्या आणि मराठा साम्राज्याचा विस्तार बंगाल आणि ओडिशापर्यंत केला. त्यांनी दक्षिण भारतातही आपले लष्करी आणि राजकीय वर्चस्व प्रस्थापित केले. ही तलवार मराठा शैलीतील फिरंगी तलवारीचे उत्तम उदाहरण आहे. एकाधारी धार आणि सोन्याचे कोरीवकाम ही या तलवारीची खास वैशिष्ट्ये आहेत. त्या काळात युरोपियन बनावटीच्या तलवारी प्रसिद्ध होत्या. या तलवारीच्या मागच्या बाजूला, तळाशी, सोन्यात ‘श्रीमंत राघोजी भोसले सेनासाहेबसुभा’ असे लिहिले आहे.
१८१७ मध्ये, ईस्ट इंडिया कंपनीने नागपूरमध्ये भोसलेंचा खजिना लुटला. कंपनीने ही तलवार सोबत नेली असावी असे तज्ज्ञांचे मत आहे. मुख्यमंत्री देवेंद्र फडणवीस यांनी यावर आनंद व्यक्त केला आणि सांगितले की, ही तलवार आता अधिकृतपणे राज्य सरकारच्या ताब्यात आली आहे याचा आम्हाला खूप आनंद आहे.
