नागपूर | नागपूर पोलिसांनी एटीएम फोडीच्या गुन्ह्यातील एक सराईत आरोपीला गजाआड करण्यात यश मिळवले आहे. पाटणकर चौकातील एस.बी.आय. बँकेच्या एटीएममध्ये घडलेल्या फोडी प्रकरणात ८,१२,८०० रुपयांची रोकड चोरली गेली होती. तपासात पोलिसांनी मिळवलेल्या सीसीटीव्ही फूटेजसह तांत्रिक पुराव्यांवरून आरोपीचा शोध घेऊन त्याला अटक करण्यात आली.
अटक आरोपीचे नाव खुर्शीद अहमद निसार अहमद (वय ५५, रा. मनेहु, जि. प्रतापगढ, उत्तरप्रदेश) असे असून, त्याने हा गुन्हा कबूल केला आहे. त्याच्या कबुलीजबाबानुसार फोडीतील २७,६०० रुपयांची रोकड जप्त करण्यात आली आहे. उर्वरित रक्कम आरोपीने आपल्या साथीदारांसोबत ठेवली असल्याचे उघड झाले आहे.
पोलिस चौकशीतून हे समोर आले की, आरोपीने मुंबई व ठाणे परिसरासह विविध ठिकाणी यापूर्वी २५ हून अधिक गुन्हे केले आहेत. पाटणकर चौकातील एटीएम फोडी प्रकरणात सहभागी असलेले इतर चार साथीदार फरार असून, त्यांचा शोध सुरू आहे.
घटनेची हकीकत अशी की, ४ सप्टेंबर २०२५ रोजी पहाटे २.३० वाजता अज्ञात चोरट्यांनी एटीएम मशीनमध्ये प्रवेश करून गॅस कटरने मशीन फोडून रोकड लंपास केली होती. बँकेच्या क्लोजिंग बॅलेन्सनुसार एटीएममध्ये १०,५०,००० रुपयांची रोकड होती, त्यापैकी ८,१२,८०० रुपयांची रक्कम चोरून नेण्यात आली.
या कारवाईनंतर नागपूर पोलिसांनी आरोपीला जेरबंद करून सराईत गुन्हेगारांचा मोठा पर्दाफाश केला असून, उर्वरित साथीदारांच्या अटकेसाठी मोहीम सुरू आहे.
