सावनेरमध्ये भीषण अपघात : ट्रकच्या चाकाखाली सापडून वृद्धाचा जागीच मृत्यू

सावनेर : तालुक्यातील नरसला-खापा रोडवर काल  दुपारी 3 वाजताच्या सुमारास झालेल्या भीषण अपघातात उत्तम जब्बूजी उइके (वय 60, रा. जोअरवाडा, ता. करंजा, जि. वर्धा) यांचा जागीच मृत्यू झाला. या अपघातात सोबत असलेला शंकर श्रवण आत्राम (वय 25, रा. जोअरवाडा, ता. करंजा, जि. वर्धा) हा गंभीर जखमी झाला.

प्राप्त माहितीनुसार, उत्तम उइके आणि शंकर आत्राम हे दोघे एमएच 40 एपी 5864 क्रमांकाच्या दुचाकीवरून नरसला-खापा मार्गाने जात होते. प्रवासादरम्यान ते लघुशंकेसाठी रस्त्याच्या कडेला थांबले असता, अचानक मागून येणाऱ्या एमएच 36 एफ 2360 क्रमांकाच्या ट्रकच्या मागच्या चाकाखाली उत्तम उइके सापडले. यात त्यांचा जागीच मृत्यू झाला.

घटनेची माहिती मिळताच हितज्योती फाउंडेशनचे हितेश बंसोड त्वरित घटनास्थळी पोहोचले आणि केलवद पोलिसांच्या मदतीने मृत व जखमींना प्राथमिक आरोग्य केंद्र, सावनेर येथे हलविण्यात आले. मात्र डॉक्टरांनी उत्तम उइके यांना मृत घोषित केले. त्यांचा मृतदेह पुढील तपासणीसाठी शवविच्छेदनाला पाठविण्यात आला आहे.

दरम्यान, केलवद पोलिसांनी ट्रकचालकाविरुद्ध गुन्हा नोंदवून पुढील तपास सुरू केला आहे. या अपघातामुळे परिसरात हळहळ व्यक्त होत आहे.