पोलीस असल्याच सांगून केली 28 हजारांची लूट; पूर्वीचा फुटपाथ विक्रेता आरोपी एकाच तासात गजाआड
नागपूर | शहरात फसवणुकीची धक्कादायक घटना उघडकीस आली आहे. लालगंज भागात शनिवारी दुपारी एका व्यक्तीकडून स्वतःला पोलिस असल्याचे सांगून 28 हजार रुपये हिसकावल्याचा प्रकार घडला. विशेष म्हणजे पोलिसांच्या जलद कारवाईत आरोपीला अवघ्या एका तासातच अटक करण्यात आली.
माहितीनुसार, पीडित करण पखाले हे आपल्या दुचाकीवरून जात असताना आरोपी सुधीर लोखंडे (रा. बजाजनगर) याने त्यांना अडवले. स्वतःला पोलिस असल्याचे सांगत त्याने पखाले यांच्या वाहनाची डिक्की तपासली आणि त्यामधील 28 हजार रुपये काढून घेतले. त्यानंतर “तुमच्यावर 36 हजारांचा दंड बाकी आहे, थेट पोलीस ठाण्यात चला” असा खोटा सांगून आरोपी रक्कम घेऊन पसार झाला.
मात्र, हुशारीने पखाले यांनी आरोपीच्या दुचाकीचे व त्याचे फोटो मोबाईलमध्ये टिपले. त्याच्याआधारे शांतिनगर पोलीस ठाण्यात तक्रार दाखल होताच क्राईम ब्रांच युनिट-3 ने तपास सुरू केला. छाननीदरम्यान आरोपी सुधीर लोखंडे याचा ठावठिकाणा शंकरनगर, शिवाजीनगर भागात लागला आणि पोलिसांनी सापळा रचून त्याला पकडले.
चौकशीत धक्कादायक माहिती समोर आली की, आरोपी पूर्वी फुटपाथवर कपड्यांचा व्यवसाय करत होता आणि याआधीही त्याच्यावर फसवणुकीचे गुन्हे दाखल आहेत. अलीकडेच त्याने नवीन दुचाकी खरेदी केली होती, त्यावरूनच त्याने ही घटना घडवली.
